İstanbul deyəndə ilk olaraq Bosfor, Ayasofya, Qız qalası, İstiqlal küçəsinin qırmızı tramvayı və Qalata qülləsi yada düşür. Bərə səfərləri zamanı qağayıları simitlə yemləmək də şəhərin gündəlik həyatının sevilən ənənələrindəndir. Lakin İstanbulun özünəməxsus simasını tamamlayan daha bir xüsusiyyət var: şəhərin küçələrində yaşayan pişiklər.

Əsrlərdir İstanbul həyatının bir hissəsi olan pişiklər bu gün şəhərin tanınmış simalarından birinə çevrilib. Son illərdə sosial şəbəkələrdə yayılan foto və videolar onların şöhrətini şəhər sərhədlərindən kənara daşıyıb. #CatsOfIstanbul və #İstanbulCats həştəqləri altında paylaşılan görüntülər İstanbul pişiklərinin dünyanın müxtəlif yerlərindən insanların diqqətini cəlb etdiyini göstərir.

İstanbulun pişikləri niyə bu qədər sevilir?

İstanbulda pişiklərlə bağlı maraqlı mənzərələrə tez-tez rast gəlmək mümkündür. Türkiyədə nümayiş yürüşü zamanı Formula 1® avtomobilinin qarşısındakı trasa çıxan, UEFA finalından əvvəl meydana daxil olan, konsert və teatr tamaşalarında görünən pişiklərin görüntüləri sosial şəbəkələrdə geniş maraq doğurub. Metro stansiyalarında, bərə terminallarında və şəhərin küçələrində sərnişinlərin yanında əyləşən pişiklər isə İstanbulun gündəlik həyatının adi mənzərələrindəndir.

8 avqust – Beynəlxalq Pişiklər Günü ərəfəsində İstanbul insanlarla pişiklər arasında formalaşmış xüsusi münasibəti ilə diqqət çəkir. Türkiyədə pişiklər uzun illərdir şəhər həyatının bir hissəsi kimi qəbul edilir. Xüsusilə İstanbulda onlar sadəcə ev heyvanı deyil, məhəllələrin tanınan sakinləri və şəhərin özünəməxsus simasının bir parçasıdır. Bu münasibət İstanbula “pişiklərin hökm sürdüyü şəhər” kimi sevimli bir ad da qazandırıb.

Sosial şəbəkələr isə İstanbul pişiklərinin dünyada tanınmasında mühüm rol oynayır. Səyahət qərarlarında sosial medianın təsiri artdıqca, insanların getdikləri şəhərlərdə real və yerli təcrübələrə marağı da güclənir. Araşdırmalara əsasən, Z nəslinin səyahət edən nümayəndələrinin 59 faizi səyahət ideyaları üçün Instagram-a, 54 faizi YouTube-a, 47 faizi isə TikTok-a müraciət edir. İstanbulun küçə pişikləri də bu platformalarda paylaşılan foto və videolar vasitəsilə şəhərin tanıdılmasına töhfə verir.

İstanbul küçələrində pişiklərə harada rast gəlmək olar?

İstanbulda pişiklərlə qarşılaşmaq üçün xüsusi ünvan axtarmağa ehtiyac yoxdur. Sultanahmet meydanı, Topqapı sarayının bağları və İstanbul Arxeologiya Muzeyləri ətrafından tutmuş şəhərin müxtəlif küçə və meydanlarına qədər pişiklərə rast gəlmək mümkündür.

Pişiklər Türkiyənin məscidlərində də uzun illərdir qorunur və sevilir. Buna görə Ayasofya və Göy məsciddə dincələn və ya ətrafda gəzən pişiklərə rast gəlmək təəccüblü deyil. Misir Çarşısı, Eminönü, Fənər, Balat, Beyoğlu, Qalata, Cihangir, Beşiktaş, Kadıköy, Ortaköy, Moda və Kuzguncuq da pişiklərlə qarşılaşa biləcəyiniz məkanlar sırasındadır.

İstanbulun pişiklərlə bağlı zəngin tarixi hətta muzeylərdə də əks olunur. Qalatada yerləşən Cat Museum Istanbul pişiklərə həsr olunan sənət nümunələri və sərgilərlə şəhərin pişiklərlə əsrlərdir davam edən münasibətini təqdim edir, eyni zamanda küçə heyvanlarına dəstək göstərir.

Pişiklər Türkiyənin digər şəhərlərində də turistləri qarşılayır

İstanbul küçə pişikləri ilə dünyada ən çox tanınan şəhərlərdən biri olsa da, Türkiyənin digər bölgələrində də pişiklər gündəlik həyatın bir hissəsidir. Efes Qədim Şəhəri və Aspendos Qədim Teatrı kimi tarixi məkanlardan sahil şəhərlərinə və böyük şəhərlərin küçələrinə qədər pişiklər ölkənin bir çox turizm məkanında ziyarətçilərin qarşısına çıxır.

Beynəlxalq Pişiklər Günü münasibətilə Türkiyəni fərqli tərəfdən kəşf etmək mümkündür. Çünki bəzən səyahətin ən yaddaqalan anları məşhur turizm məkanlarında deyil, küçədə qarşılaşdığınız mehriban bir pişiyin yaratdığı sadə və xoş anlarda gizlənir.