Peru ərazisində And dağlarında yerləşən La Rinkonada dəniz səviyyəsindən 5 min metr yüksəklikdə yerləşir və dünyanın ən yüksək yaşayış məntəqəsi hesab olunur. Qızıl yataqlarının üzərində salınan bu məkan təxminən 40 il əvvəl müvəqqəti mədən düşərgəsi kimi fəaliyyətə başlayıb. Aşağı oksigen səviyyəsinə baxmayaraq, bölgənin əhalisi illər ərzində artıb və hazırda burada təxminən 50 min insan yaşayır. Ərazidə su təchizatı və kanalizasiya sistemi yoxdur. Tullantılar utilizasiya edilmək əvəzinə yandırılır və ya torpağa basdırılır.

Bu dağ şəhərciyinə çatmaq olduqca çətindir. Səyahət etmək istəyənlər əvvəlcə Alejandro Velasko Astete Beynəlxalq Hava Limanına uçur, daha sonra avtobus və ya qatarla Puno şəhərinə gedirlər. Punodan yola çıxan avtobuslar nadir hallarda hərəkət edir və yollar sürücülər üçün ciddi çətinliklər yaradır. Buna görə bir çox insan təcrübəli yerli sürücülərin xidmətindən istifadə etməyə üstünlük verir. La Rinkonadada otel yoxdur. Səyyahlar adətən şəhərə bir günlük səfər edir və gecələmək üçün yaxınlıqdakı Xuliaka şəhərinə gedirlər.

Yeraltı tarix: Dərinquyu

Türkiyənin Kapadokya bölgəsində yerləşən Dərinquyu yerin 85 metr dərinliyinə qədər uzanır. 18 mərtəbədən ibarət tunel sistemi olan bu qədim yeraltı şəhərində vaxtilə 20 minə qədər insan yaşayıb. 1920-ci illərdəki Türkiyə-Yunanıstan müharibəsi zamanı tərk edilən məkan uzun müddət istifadəsiz qalıb. 1963-cü ildə yenidən aşkar edilən bu tikili hazırda UNESCO-nun Dünya İrsi siyahısına daxildir.

Dərinquyuya Göremedən yola çıxan avtobuslarla getmək mümkündür. Bir çox turist ərazini araşdırmaq üçün bələdçili turlara üstünlük verir. Gecələmək üçün isə yaxınlıqdakı Nevşehir və Göreme şəhərləri populyar seçimlərdir.

Qütb soyuğunun və qaranlığın ünvanı: Lonqyirbyen

Norveçə məxsus Svalbard arxipelaqında yerləşən Lonqyirbyen cəmi 2 400 sakini ilə dünyanın ən şimal yaşayış məntəqələrindən biridir. Qütb gecələrinin yaşandığı dövrdə bölgə dörd ay ərzində tamamilə qaranlığa qərq olur. İlin təxminən iki ay yarımında gündüzlə gecə arasındakı fərqi ayırd etmək mümkün deyil. Əksinə, yay aylarında Günəş heç vaxt üfüqdən aşağı enmir.

Bölgədə qütb ayıları sərbəst dolaşdığı üçün yerli sakinlər şəhər sərhədlərindən kənara çıxarkən özləri ilə silah götürməli olurlar. Şimal maralı və balinalar kimi vəhşi təbiət nümayəndələrinə də tez-tez rast gəlinir.

Şəhərə Svalbard hava limanı vasitəsilə getmək mümkündür. Hava limanından taksi və ya servis avtomobilləri ilə şəhər mərkəzinə çatmaq olar. Visit Svalbard məlumatlarına görə, bölgədə altı otellə yanaşı, müxtəlif qonaq evləri də fəaliyyət göstərir.

Qırmızı səhranın gizli dünyası: Kuber Pedi

Avstraliyanın cənubundakı ucqar çöllükdə yerləşən Kuber Pedi dünyanın Opal paytaxtı kimi tanınır və təxminən 2 500 nəfər əhaliyə malikdir. Yay aylarında havanın temperaturu 52 dərəcəyə çatır. Bu dözülməz istidən qorunmaq istəyən yerli sakinlərin 60 faizi qayalı təpələrin içində qazılmış evlərdə yaşayır. Temperatur o qədər yüksək olur ki, sakinlər elektron cihazların xarab olmaması üçün onları soyuducularda saxlayırlar.

Bölgəyə yerli hava limanına uçuşlarla və ya Stüart şossesi ilə avtomobillə getmək mümkündür. Səhra şəhərciyini ziyarət edənlər otel, motel, mənzil, karvan parkı və düşərgə məkanlarından seçim edə bilərlər.

Buludların üzərindəki paytaxt: La Paz

Boliviyanın mərkəzində yerləşən La Paz dəniz səviyyəsindən 3 650 metr yüksəklikdə yerləşir və dünyanın ən yüksək paytaxtıdır. İllimani dağının ətəyində salınan şəhərin əhalisi 755 min nəfərdir. Şəhərdaxili nəqliyyatda kanat yollarından geniş istifadə olunur. La Paz möhtəşəm muzeyləri, XIX əsrə aid kilsələri və canlı bazarları ilə diqqət çəkir.

Şəhərə hava yolu ilə El Alto Beynəlxalq Hava Limanı vasitəsilə getmək mümkündür. Hava limanından ictimai nəqliyyat və ya təxminən 30 dəqiqəlik avtomobil səfəri ilə şəhər mərkəzinə çatmaq olar. Sopaçokçi rayonu turistlər arasında populyar yaşayış məkanıdır.

Qayaların altında salınan kənd: Setenil de las Bodeqas

İspaniyanın cənubundakı bu kənddə sakinlər nəhəng qaya kütlələrinin birbaşa altında inşa edilmiş evlərdə yaşayırlar. Qayaları oyaraq ev tikmək əvəzinə, tikililər birbaşa qayalara söykənir. Restoranlar, mağazalar və barlar da bu nəhəng qaya formasiyalarının kölgəsində fəaliyyət göstərir.

Kəndə ən yaxın dəmir yolu stansiyası təxminən 5 kilometr məsafədə yerləşir. Bundan əlavə, avtomobil yolları da səyahət edənlər üçün rahat imkan yaradır. Kənddə qaya relyefinə uyğun dizayn edilmiş çoxsaylı otellər fəaliyyət göstərir.

Aydın