Gecə növbəsində işləmək və xroniki yuxusuzluq post-COVID sindromunun inkişaf ehtimalını iki dəfəyə qədər artıra bilər. Bu qənaətə Avstriyanın Vyana Tibb Universitetinin İspaniyadakı həmkarları ilə birgə apardığı araşdırmanın nəticələri əsasında gəlinib.
Qaynarinfo xəbər verir ki, tədqiqatın nəticələri "Scandinavian Journal of Work, Environment & Health" (SWEH) jurnalında dərc olunub.
Prospektiv COVICAT araşdırması çərçivəsində alimlər Kataloniyada yaşayan təxminən 1900 nəfərin sağlamlıq məlumatlarını toplayıblar. İştirakçılar 2021-2023-cü illər ərzində müşahidə altında olublar. İş və yuxu xüsusiyyətləri COVID-19-a yoluxmadan əvvəl qiymətləndirilib. Post-COVID sindromu isə SARS-CoV-2 infeksiyasından üç aydan çox müddət sonra simptomların davam etməsi kimi müəyyənləşdirilib.
İki illik müşahidə dövründə 1899 iştirakçı COVID-19-a yoluxub və onların 284-də post-COVID sindromu inkişaf edib. Məlum olub ki, gecə növbəsində çalışanlarda uzunmüddətli simptomların yaranma riski gündüz işləyənlərlə müqayisədə 88 faiz daha yüksəkdir. Bu əlaqə cins, bədən kütləsi indeksi və xronotip nəzərə alındıqdan sonra da qorunub.
Piylənmədən əziyyət çəkən gecə növbəsi işçilərində risk daha yüksək olub. Alimlər həmçinin xroniki yuxusuzluqla post-COVID sindromu arasında əlaqə müəyyən ediblər. Yuxu pozuntusu olan insanlarda sindromun inkişaf ehtimalı 42 faiz daha yüksək olub.
Ən ciddi nəticə isə hər iki amilin birləşdiyi halda müşahidə edilib. Xroniki yuxusuzluqdan əziyyət çəkən gecə növbəsi işçilərində post-COVID sindromunun inkişaf riski xroniki yuxusuzluğu olmayan gündüz növbəsi işçiləri ilə müqayisədə 2,7 dəfə yüksək olub.
Post-COVID sindromu COVID-19 keçirildikdən sonra 12 həftə və ya daha uzun müddət ərzində davam edən və ya sonradan ortaya çıxan simptomlarla xarakterizə olunur. Bu zaman virus artıq orqanizmdə olmaya bilər. Əsas simptomlara istirahətdən sonra belə keçməyən güclü yorğunluq və halsızlıq, nəfəs darlığı, hava çatışmazlığı hissi, baş ağrıları və yaddaş pozuntuları daxildir.
Aydın
Şərhlər