Qaraciyər hər gün mühüm funksiyaları yerinə yetirir. O, orqanizmdən toksinlərin xaric edilməsinə və qida maddələrinin emalına kömək edir. Araşdırmalar göstərir ki, yaşıl çay qaraciyərin sağlamlığını dəstəkləyə bilər.

Qaynarinfo "EatingWell"ə istinadən xəbər verir ki, əvvəllər qaraciyər xəstəliklərinin ən geniş yayılmış səbəbi alkoqoldan sui-istifadə hesab olunurdusa, hazırda əsas səbəblərdən biri metabolik disfunksiya ilə əlaqəli steatotik qaraciyər xəstəliyidir (MASLD). Bu vəziyyət qaraciyərdə yağın toplanmasına səbəb olur və ciddi xəstəliklərə qədər inkişaf edə bilər.

Qaraciyər piylənməsinin ilkin mərhələlərində qidalanma və həyat tərzində dəyişikliklərə ehtiyac yaranır. Bununla yanaşı, yaşıl çay əlavə dəstək vasitəsi ola bilər.

Dietoloq Ceki Bridsonun sözlərinə görə, yaşıl çayın əsas antioksidantı olan EGCG orqanizmə yağları və şəkəri daha səmərəli emal etməyə kömək edə bilər. Bəzi araşdırmalar da yaşıl çay qəbulunu qaraciyər xəstəlikləri riskinin bir qədər azalması və qaraciyərdə yağ toplanmasının azalması ilə əlaqələndirir.

Araşdırmalardan biri göstərib ki, gündə 3-4 fincan yaşıl çay və polifenollarla zəngin əlavə bitki məhsullarını ehtiva edən "yaşıl" Aralıq dənizi pəhrizi ənənəvi Aralıq dənizi pəhrizi ilə müqayisədə qaraciyərdə yağ toplanmasının daha çox azalmasına səbəb olub.

Bağırsaq da "bağırsaq-qaraciyər əlaqəsi" adlanan mexanizm vasitəsilə qaraciyərin sağlamlığında mühüm rol oynayır.

Diyetoloq Endi De Santisin sözlərinə görə, yaşıl çayın polifenolları antioksidant və iltihabəleyhinə xüsusiyyətlərə malikdir və bağırsaq mikrobiomuna təsir göstərə bilər.

De Santis izah edir ki, bu polifenollar faydalı bağırsaq bakteriyalarının çoxalmasına kömək edir və arzuolunmaz bakteriyaların təsirini çətinləşdirir.

Həzm sistemindən gələn qan qaraciyərə daxil olduqda bağırsaqlarda arzuolunmaz bakteriyaların həddindən artıq çoxalması nəticəsində yaranan zərərli birləşmələr də qaraciyərə çata və orqanın zədələnməsinə səbəb ola bilər.

Xroniki iltihab və oksidləşdirici stress qaraciyərin zədələnməsinə və xəstəliklərin inkişafına səbəb olan proseslərdən biridir.

Diyetoloq Kerolayn Tomason Bunnun sözlərinə görə, yaşıl çayın tərkibindəki katexinlər qaraciyər hüceyrələrini oksidləşdirici stress və iltihabdan qoruya bilər.

Hüceyrə səviyyəsində aparılan araşdırmalar göstərir ki, yaşıl çayın polifenolları iltihabi siqnalları azalda və orqanizmin öz antioksidant müdafiəsini gücləndirə bilər. İltihab və oksidləşdirici stress hüceyrələrin zədələnməsinə və qaraciyərdə yağ toplanmasına səbəb olduğundan, bu birləşmələr belə zərərin azalmasına kömək edə bilər.

Qaraciyər fermentləri orqanın yükünü qiymətləndirməyə və qaraciyər xəstəliyi və ya zədələnməsinin əlamətlərini müəyyən etməyə kömək edən göstəricilərdir.

Bəzi kiçik araşdırmalar göstərib ki, hər gün yaşıl çay içmək xüsusilə göstəriciləri yüksək olan və ya qaraciyər xəstəliklərindən əziyyət çəkən insanlarda AST, ALT və ALP fermentlərinin səviyyəsini azalda bilər.

Qaraciyərin sağlamlığı üçün yalnız içkilər deyil, ümumi həyat tərzi də vacibdir. Gündəlik əlavə şəkər qəbulunu 50 qramla məhdudlaşdırmaq və tərəvəz, meyvə, tam taxıllı məhsullar, paxlalılar, qoz-fındıq, toxumlar və yağsız zülallardan ibarət balanslaşdırılmış qidalanmaya üstünlük vermək tövsiyə olunur.

Həftədə ən azı 150 dəqiqə fiziki aktivlik qaraciyərdə yağ miqdarını azalda bilər. Alkoqoldan mümkün qədər uzaq durmaq da tövsiyə edilir. Alkoqol qəbul edən insanlar üçün isə gündəlik miqdarın kişilərdə iki, qadınlarda isə bir porsiyadan az olması qaraciyərin zədələnməsi riskini azalda bilər.

Adi yaşıl çay qidalanmaya faydalı əlavə ola bilər. Lakin əlavələrdən istifadə zamanı ehtiyatlı olmaq lazımdır: yüksək dozalı yaşıl çay ekstraktı tabletləri bəzi hallarda qaraciyərin zədələnməsi ilə əlaqələndirilib.

Aydın